زهرة / الشاعر احمد ارميلة

( زهره )

كان الشاعر( احمد ارميلة )  في فندق الواحة والكلام هذا له اسنين من قبل (2011) واعتقد ان "زهره" كانت تعمل في الاستعلامات المهم انه حقها في الفندق وخلاص وقيسّا "مطراها غبر" وكان مع الشاعر أحد اصدقائه وطلب من الشاعر انه يقول عليها ولكن بشرط أن يكون اسمها في القصيدة ولكن الشاعر لم يكتفي بذلك بل جعل من اسمها قافية للقصيدة بالرغم من عقم القافية..بيش "يستمخ" صاحبه وغيره..  وقال :

فندق الواحه فيه رينا زهره 

لها خد كيف البدر داير بهره 

==== ====

فندق الواحة فيه ريت عجيبه

اسنونها يلجّن والعيون رغيبه

من شان خاطري عندي كلام انجيبه

انقوله عليها بيش تاخذ شهره

إلا نا امسلّم فى الغلا و سريبه

اموالف علي بعد العزاز وقهره

== == == ==

فندق الواحة فيه ريت صغيره

كيف يا جماعه صورة الموجيره

اللي بالشريعة له تكون عشيره

في خير يقعد نين يكمل دهره

وانكان اهلباته ينقسم تفكيره

ايطوّل وهو سرّه امخالف جهره

== == == ==

فندق الواحة فيه ريت سعادي

وريت بنت بيضة والعيون عوادي

اقرونها كما ضفّة نخيل مقادي

نهار ليل يجّارن سواقي نهره

ونا اجهدي قاصر دوّتي سقّادي

لا أنخيل عالسّابق ولا عالمهره

== == == ==

فندق الواحة فيه سود حجابه

الخايل اللي كيف الحليب أنيابه

خطَّر أوصاف قديم طول اغيابه

أيامه تعيبة كي ليالي شهره

حتى انكان من ياسه اطفي منشابه

امقابلات ما زالن امواير وهره

== == == ==

فندق الواحة فيه ريت الشوعة

اللي تقول من قطعة ذهب مصنوعة

لها خد كيف البدر وآن طلوعه

هني بال من ياجد امعاها سهره

ولكن علي سنّة الله وطوعه

هويد ليلة الجمعة أسبوع الظهره

..

الشاعر احمد ارميله الفاخري