يإجدابيا جاك الخبر م البيضا.. ليبيا اتَنس لها سنين مريضة

يإجدابيا جاك الخبر م البيضا.. ليبيا اتَنس لها سنين مريضة


يإجدابيا ماغابن .. طبرق ودرنة عالفخر يزابن

والمرج وقمينس وين ما ايتنابن ..  يشيلن بعالي الصوت يوم نهيضه

بنغازي بلاد العز ما يرتابن .. سلم تريسك قاضيين فريضة


ومي منكورة ...   يوم ثورة الشباب في تاجورا

والزنتان ماغابت فوسط الصورة ..  ويفرن معاها قاسمة م الغيضة


وجانا دافع ..   وجايب مسوع جايبين مدافع

فالبيضا عطوه نهار سيدي رافع ..  وخشوا على اللهلاب في تغييضه



في وسط بنغازي الدم يترع .. قدام الكتيبة والتريس امصرع

فراسين ماهابو رصاص مدرع .. سلم شبابك ماتجيه قريضة


وفي الابيار .. وطلميثة وتوكرة ودريانة وسلوق صار نهار

أصقورة أتريسك من أطيور حرار ..  منين إيتنفض يعجبك تنفيضة


وفي مصراته ..   سلم تريس الكرب في عازاته

والرجبان ما غابوا على دعكاته ..  ويالزاوية زيدي اللهب تنويضة

وساعدوا طرابلس شاغلوا قواته ..  واصمدوا يجود الله واسع فيضه


وياترهونة ..  سلم شبابك وين قابل عونه

ويابلاد الاسمر اقلبي قانونه ..  جدكم شريف وما كلاش البيضة

ويابن وليد والله عالم كونه ..  هظا وقت فيه الوطن يبرد قيظه


ياجبل غريان ..  وياطرابلس ياخيرة البلدان

ثوري عليه الظلم والطغيان ..  ما يعوز نكتبلك اليوم عريضة

وثوري بكل الحيل يافزان .. وياسبها بلاد العز تبقا ريضة

وراهو الظالم ما معاه أمان ..  نتكاتفوا نحيدوا دولتا البغيضة

والتاريخ يكتب لاشراف والخيان ..  لابناءنا يسجل خطوط عريضة

هناك تعليق واحد:

ahmed almeguary يقول...

ماشاء الله قمة الروعه والإبدااااااااااااع