شن معناها ؟...الشاعر حازم الصبيحي

شن معناها ؟؟!
شن معناها ؟

تشوفك العين يريح كل شقاها  .. نا نقول وأنتَ قول
شن معناها ؟

شن تفسيرك ؟
ماعاد يملاها حياتي غيرك


نا نقول .. وانت شغّله تفكيرك
معنى رياف العين وأنتَ حذاها ؟

ولهفة الروح عليك شن تقديرك ؟
وليش اتّعذب وين ما تجفاها ؟

وعقلي يتحمل ليش في تقصيرك ؟
وليش بوجودك دنيتي تملاها ؟

وليش انتمنى دوم نبقى طيرك ؟
وحتى السية أديرها .. ونمحاها

شن معناه ؟
روحي تحت أمره وديما فداه

ونا نقولك كيف الاحساس بلاه
ماعاد تبقى للحياة معناها

الدنيا اتّبسم وين ما نلقاه
وروحي لقت في دنيته مرساها

ومانحس طعم الفرح غير حذاه
ظلمة حياتي هو اللي ضواها

غير قول لي معنى اللي قلناه ؟
كان ما فهمت أنقولك معناها

من يوم ما فــ القلب حام غلاه
غيّر حياتي ودنيتي حلاّها

وحق من خلق هالكون نا نهواه
وكني كذبت .. إن شاء الله نلقاها

ليست هناك تعليقات: